ഗോൾഡ് കോസ്റ്റിൽ ഗ്രാൻഡ് പേരന്റ്സ് ഡേ ആഘോഷിച്ചു

ഗോൾഡ് കോസ്റ്റ്: ഗോൾഡ് കോസ്റ്റ് മലയാളി അസോസിയേഷന്റെ ആഭിമുഖ്യത്തിൽ ‘ഗ്രാൻഡ് പേരന്റ്സ് ഡേ’വിപുലമായി ആഘോഷിച്ചു. സി.പി. സാജുവിന്റെ അധ്യക്ഷതയിൽ കൂടിയ സമ്മേളനം നടനും സംവിധായകനുമായ ജോയ് കെ. മാത്യു ഉദ്ഘാടനം ചെയ്തു.

ഡോ. അജയ് കെ. കുര്യാക്കോസ്, ഡോ. പ്രതിഭ ജോസ് എന്നിവരുടെ നേതൃത്വത്തിൽ ആരോഗ്യ സെമിനാർ സമ്മേളനത്തിന്റെ ഭാഗമായി നടത്തി. പ്രായമായ ആളുകൾ നേരിടുന്ന ആരോഗ്യ പ്രശ്നങ്ങളും പരിഹാരമാർഗ്ഗങ്ങളും മറ്റു നിർദ്ദേശങ്ങളും സെമിനാറിൽ അവതരിപ്പിച്ചു.

യോഗത്തിന് ഗോൾഡ് കോസ്റ്റ് മലയാളി അസോസിയേഷൻ പ്രസിഡന്റ് മനോജ് തോമസ് സ്വാഗതം പറഞ്ഞു. പ്രസ്തുത പരിപാടികൾക്ക് മലയാളി അസോസിയേഷൻ ഭാരവാഹികളായ ആന്റണി ഫിലിപ്പ്, ബിബിൻ മാർക്ക്, വിപിൻ ജോസഫ്, ജെൽജോ ജെയിംസ്, അരുൺ കൃഷ്ണൻ, സിബി മാത്യു, കമൽ ചന്ദ്രൻ എന്നിവർ നേതൃത്വം നൽകി. സ്നേഹവിരുന്നോടെ സമ്മേളനം സമാപിച്ചു.