മെൽബണിലെ ഹിന്ദു ധർമ്മ കമ്മ്യൂണിറ്റി ഓണാഘോഷം സംഘടിപ്പിച്ചു

മെൽബൺ: മെൽബണിലെ ‘ഹിന്ദു ധർമ്മ കമ്മ്യൂണിറ്റി’യുടെ (HDCM) ആഭിമുഖ്യത്തിൽ വിക്ടോറിയയിലെ ഹിന്ദു സമൂഹത്തെ ഒന്നിപ്പിച്ചുകൊണ്ട് സംഘടിപ്പിച്ച ഓണാഘോഷം ശ്രദ്ധേയമായി. ഓഗസ്റ്റ് 2-ന് വൈകുന്നേരം ബാക്കസ് മാർഷ് ഹാളിൽ നടന്ന വർണ്ണാഭമായ ചടങ്ങിൽ മുന്നൂറിലധികം ആളുകൾ പങ്കെടുത്തു.

എൺപതോളം കലാകാരന്മാർ അണിനിരന്ന സാംസ്കാരിക സന്ധ്യ ആഘോഷങ്ങൾക്ക് മാറ്റുകൂട്ടി. ആവേശകരമായ ചെണ്ടമേളം, തിരുവാതിരക്കളി, കുച്ചിപ്പുടി, ഭക്തിഗാനങ്ങൾ, നാടോടി നൃത്തങ്ങൾ, സംഗീത വിരുന്നുകൾ തുടങ്ങിയ വിവിധ കലാരൂപങ്ങൾ അരങ്ങേറി. കുട്ടികളും മുതിർന്നവരും അടക്കം സമൂഹത്തിന്റെ എല്ലാ മേഖലകളിലുള്ളവരും ആഘോഷങ്ങളിൽ പങ്കാളികളായി.

യുവതലമുറയ്ക്ക് സാംസ്കാരിക പൈതൃകം തൊട്ടറിയാനും ഓസ്‌ട്രേലിയൻ സമൂഹത്തിന് കേരളത്തിന്റെ തനിമ പരിചയപ്പെടുത്താനും ഈ കൂട്ടായ്മ സഹായിച്ചതായി സംഘാടകർ വ്യക്തമാക്കി. ശക്തമായ സാംസ്കാരിക ബന്ധങ്ങളാണ് ഇത്തരം കൂട്ടായ്മകളിലൂടെ ഊട്ടിയുറപ്പിക്കപ്പെടുന്നതെന്നും പരിപാടി വിജയമാക്കാൻ സഹകരിച്ച എല്ലാവർക്കും നന്ദി അറിയിക്കുന്നതായും HDCM ഭാരവാഹികൾ കൂട്ടിച്ചേർത്തു.

കേരളീയ തനിമ വിളിച്ചോതുന്ന വിപുലമായ പരമ്പരാഗത ഓണസദ്യയോടെയാണ് ആഘോഷ പരിപാടികൾ സമാപിച്ചത്. വിക്ടോറിയയിൽ സാംസ്കാരിക അവബോധം വളർത്താനും ഐക്യവും പരമ്പരാഗത മൂല്യങ്ങളും സംരക്ഷിക്കാനും മുൻപന്തിയിൽ നിൽക്കുമെന്ന് HDCM വ്യക്തമാക്കി.