മെല്‍ബണ്‍: സിറോ മലബാര്‍ സഭാ പാരമ്പര്യങ്ങളും കേരളത്തിന്‍റെ സാംസ്കാരികവും കലാപരവുമായ പൈതൃകങ്ങളും വരും തലമുറയ്ക്ക് പകര്‍ന്ന് നല്‍കാനായി സെന്‍റ് അല്‍ഫോന്‍സ സിറോ മലബാര്‍ കത്തീഡ്രല്‍ ഇടവകയുടെ നേതൃത്വത്തില്‍ രൂപംകൊടുത്തിട്ടുള്ള സിറോ മലബാര്‍ കള്‍ച്ചറല്‍ സെന്‍ററിന്‍റെ ഉദ്ഘാടനം മെല്‍ബണ്‍ സിറോ മലബാര്‍ രൂപതാധ്യക്ഷന്‍ അഭിവന്ദ്യ ബോസ്കോ പുത്തൂര്‍ പിതാവ് നിർവഹിച്ചു.
ഓസ്ട്രേലിയായിലെ സിറോ മലബാര്‍ ക്രൈസ്തവ വിശ്വാസികളെ സംബന്ധിച്ചിടത്തോളം നമ്മുടെ സംസ്കാരവും വിശ്വാസവും ഓസ്ട്രേലിയന്‍ സമൂഹത്തില്‍ പങ്കുവയ്ക്കാന്‍ കടപ്പെട്ടവരാണെന്ന് സിറോ മലബാര്‍ കള്‍ച്ചറല്‍ സെന്‍ററിന്‍റെ ഉദ്ഘാടനം നിർവഹിച്ചുകൊണ്ട് നൽകിയ വിഡിയോ സന്ദേശത്തിലൂടെ പിതാവ് ഓർമിപ്പിച്ചു.
കത്തീഡ്രല്‍ വികാരി ഫാദര്‍ വര്‍ഗ്ഗീസ് വാവോലിലും ഭാരവാഹികളും ചേര്‍ന്ന് ദീപംകൊളുത്തി സിറോ മലബാര്‍ കള്‍ച്ചറല്‍ സെന്‍ററിനു സമാരംഭം കുറിച്ചു.
സിറോ മലബാര്‍ പാരമ്പര്യവും സംസ്കാരവും പകര്‍ന്നു നൽകാന്‍ കഴിയുന്ന വസ്തുക്കള്‍ ഉള്‍പ്പെടുത്തികൊണ്ടുള്ള മ്യൂസിയം സ്ഥാപിക്കുക, കേരളീയ തനതുശൈലിയിലുള്ള ഭക്ഷണം ഒരുക്കുവാനുള്ള പരിശീലനം നൽകുക, മലയാളഭാഷാ പുസ്തകങ്ങളുടെ ശേഖരം ഉള്‍പ്പെട്ട വായനശാലയ്ക്കു രൂപം നൽകുകക, കേരളീയ കലകളുടെ പരിശീലനത്തിനു വേദിയൊരുക്കുക തുടങ്ങിയവയാണ് സിറോ മലബാര്‍ കള്‍ച്ചറല്‍ സെന്‍റര്‍ ലക്ഷ്യം വയ്ക്കുന്നത്.