ഓസ്ട്രേലിയൻ പ്രതിനിധി സംഘം കേരള നിയമസഭ സന്ദർശിച്ചു
തിരുവനന്തപുരം: ഓസ്ട്രേലിയയിലെ വിക്ടോറിയ സംസ്ഥാനവും കേരളവും തമ്മിലുള്ള ഉഭയകക്ഷി ബന്ധവും സാംസ്കാരിക-വ്യാവസായിക സഹകരണവും കൂടുതൽ ശക്തമാക്കുന്നതിന്റെ ഭാഗമായി ഓസ്ട്രേലിയൻ പ്രതിനിധി സംഘം കേരളത്തിൽ സന്ദർശനം നടത്തി.
വിക്ടോറിയൻ പാർലമെന്റ് അംഗം ലീ തർലാമിസിന്റെ (Lee Tarlamis MP) നേതൃത്വത്തിലുള്ള സംഘമാണ് കേരളത്തിലെ പ്രമുഖ രാഷ്ട്രീയ-ഭരണ നേതാക്കളുമായി കൂടിക്കാഴ്ച നടത്തിയത്. ഓസ്ട്രേലിയൻ മലയാളി സമൂഹത്തിന് അഭിമാനമായി, ഗവൺമെന്റ് പ്രതിനിധിയായി മലയാളിയായ ഫിനി മാത്യുവും ഈ ഔദ്യോഗിക പ്രതിനിധി സംഘത്തിന്റെ ഭാഗമായി ഒപ്പമുണ്ടായിരുന്നു.
സന്ദർശനത്തിന്റെ ഭാഗമായി കേരള നിയമസഭാ മന്ദിരത്തിലെത്തിയ വിക്ടോറിയൻ പ്രതിനിധി സംഘത്തിന് ഊഷ്മളമായ സ്വീകരണമാണ് ലഭിച്ചത്. കേരള നിയമസഭാ സ്പീക്കർ തിരുവഞ്ചൂർ രാധാകൃഷ്ണൻ, ഡെപ്യൂട്ടി സ്പീക്കർ ഷാനിമോൾ ഉസ്മാൻ എന്നിവർ ചേർന്ന് സംഘത്തെ സ്വീകരിക്കുകയും ആതിഥേയത്വം വഹിക്കുകയും ചെയ്തു. നിയമസഭയിലെ സഭാ നടപടികൾ നേരിട്ട് വീക്ഷിച്ച പ്രതിനിധി സംഘം, ഇരു സംസ്ഥാനങ്ങളും തമ്മിലുള്ള ജനാധിപത്യ മൂല്യങ്ങളെയും സഹകരണ സാധ്യതകളെയും കുറിച്ച് സ്പീക്കറുമായും ഡെപ്യൂട്ടി സ്പീക്കറുമായും ആശയവിനിമയം നടത്തി.
മുഖ്യമന്ത്രി വി. ഡി. സതീശനുമായി കൂടിക്കാഴ്ച
കേരള മുഖ്യമന്ത്രി വി. ഡി. സതീശൻ ഓസ്ട്രേലിയൻ സംഘത്തിനായി ഒരുക്കിയ പ്രത്യേക കൂടിക്കാഴ്ച ഏറെ ശ്രദ്ധേയമായി.
വിക്ടോറിയയും കേരളവും തമ്മിൽ വ്യാപാരം, വിദ്യാഭ്യാസം, ആരോഗ്യം, മൾട്ടികൾച്ചറൽ രംഗം തുടങ്ങിയ മേഖലകളിൽ പുതിയ പങ്കാളിത്തത്തിന് വഴിതുറക്കുന്നതായിരുന്നു മുഖ്യമന്ത്രിയുമായുള്ള ചർച്ചകൾ. പരസ്പര ബഹുമാനത്തിലും പങ്കുവെക്കപ്പെട്ട കാഴ്ചപ്പാടുകളിലും അധിഷ്ഠിതമായ അന്താരാഷ്ട്ര സൗഹൃദം ഇരു സംസ്ഥാനങ്ങളിലെയും ജനങ്ങൾക്ക് കൂടുതൽ അവസരങ്ങൾ സൃഷ്ടിക്കുമെന്ന് മുഖ്യമന്ത്രിയുമായുള്ള കൂടിക്കാഴ്ചയ്ക്ക് ശേഷം ലീ തർലാമിസ് വ്യക്തമാക്കി.
പ്രമുഖ നേതാക്കളുമായി ആശയവിനിമയം
കേരളത്തിലെ പ്രമുഖ രാഷ്ട്രീയ നേതാക്കളായ രമേശ് ചെന്നിത്തല, അനൂപ് ജേക്കബ്, പി. കെ. ബഷീർ, അബ്ദുൽ ഗഫൂർ, കെ. എ. തുളസി, ചീഫ് വിപ്പ് അപ്പു ജോൺ ജോസഫ് എന്നിവരുമായും പ്രതിനിധി സംഘം കൂടിക്കാഴ്ച നടത്തി.
വിക്ടോറിയയിലെയും കേരളത്തിലെയും ജനങ്ങൾ തമ്മിലുള്ള ബന്ധം (People-to-People ties) കൂടുതൽ ദൃഢമാക്കാനും ഭാവിയിലെ വികസന കൂട്ടായ്മകൾക്ക് അടിത്തറയിടാനും ഈ സമ്പർക്കങ്ങൾ ഉപകരിക്കുമെന്ന് സംഘം വിലയിരുത്തി.
ഓസ്ട്രേലിയൻ മലയാളി സമൂഹത്തിന്റെ പ്രതിനിധിയായി ഫിനി മാത്യു ഈ സംഘത്തിൽ സജീവ സാന്നിധ്യമായത്, വിക്ടോറിയൻ ഗവൺമെന്റിന് പ്രവാസി മലയാളികളോടുള്ള കരുതലിന്റെയും അംഗീകാരത്തിന്റെയും തെളിവായി മാറി. വിക്ടോറിയ-കേരള ബന്ധത്തിൽ ഒരു പുതിയ സുവർണ്ണ അധ്യായം കുറിക്കുന്നതായിരുന്നു ഈ സന്ദർശനം.
