ന്യൂസീലൻഡിലെ ജസ്റ്റിസ് ഓഫ് പീസ് പദവിയിലേക്ക് ഒരു മലയാളി നഴ്സ്

ന്യൂസീലൻഡ്: പാമേർസ്റ്റൺ നോർത്തിലെ ആരോഗ്യമേഖലയിൽ സേവനമനുഷ്ഠിക്കുന്ന നഴ്സായ രാജീ റോബിൻ, ന്യൂസീലൻഡിലെ ജസ്റ്റിസ് ഓഫ് പീസ് (JP) പദവിയിലേക്ക് നിയമിതയായി. രാജ്യത്തിന്റെ നീതിന്യായ വ്യവസ്ഥയിൽ സുപ്രധാനമായ ഈ പദവിയിലേക്ക് ഒരു മലയാളി വനിത എത്തുന്നത് ന്യൂസീലൻഡിലെ മുഴുവൻ മലയാളി സമൂഹത്തിനും പ്രത്യേകിച്ച് യുവതലമുറയ്ക്ക് വലിയ പ്രചോദനമാണ്.

ആരോഗ്യമേഖലയിലെ തിരക്കിട്ട ജീവിതത്തിനിടയിലും, വർഷങ്ങളായി സമൂഹത്തിൽ നിസ്വാർഥ സേവനം കാഴ്ചവയ്ക്കുകയും, സാമൂഹിക പ്രവർത്തനങ്ങളിൽ ഇടപെടുകയും ചെയ്ത രാജീ റോബിന്റെ കഠിനാധ്വാനത്തിനും സത്യസന്ധതയ്ക്കും ലഭിച്ച അംഗീകാരം കൂടിയാണിത്. പാമേർസ്റ്റൺ നോർത്തിലെ മലയാളി കൂട്ടായ്മകളിലും പൊതുരംഗത്തും രാജീ റോബിന്റെ സാന്നിധ്യം പ്രശംസനീയമാണ്.

ഒരു ജസ്റ്റിസ് ഓഫ് പീസ് എന്ന നിലയിൽ, സമൂഹത്തിന് നിയമപരമായ പിന്തുണ നൽകുന്നതിൽ രാജീ റോബിന്റെ പങ്ക് നിർണായകമാകും. ഈ നിയമനം ന്യൂസീലൻഡിലെ മലയാളി സമൂഹത്തിന്റെ പ്രതിച്ഛായ വർധിപ്പിക്കുമെന്നും, കൂടുതൽ പേർക്ക് പൊതുരംഗത്ത് സജീവമാകാൻ പ്രചോദനമാകുമെന്നും പ്രതീക്ഷിക്കുന്നു.