2020-21ൽ 1.6 ലക്ഷം പേർക്ക് ഓസ്‌ട്രേലിയൻ PR; രണ്ടാം സ്ഥാനത്ത് ഇന്ത്യക്കാർ
2020-21 കാലയളവിൽ 160000 ൽ അധികം പേർക്ക് ഓസ്‌ട്രേലിയൻ പെർമനന്റ് റെസിഡൻസി ലഭിച്ചതായി കുടിയേറ്റ വിഭാഗത്തിന്റെ കണക്കുകൾ വ്യക്തമാക്കുന്നു. ഏറ്റവും അധികം PR വിസ ലഭിച്ചവരിൽ ഇന്ത്യയിൽ നിന്നുളളവരാണ് രണ്ടാമത്.
കൊറോണവൈറസ് മഹാമാരിമൂലമുള്ള അതിർത്തി നിയന്ത്രണങ്ങളും, വിസ നൽകുന്നതിൽ നേരിടുന്ന കാലതാമസവുമൊക്കെ ഉണ്ടായിട്ടും 2020-21 കാലയളവിൽ പ്രതീക്ഷിച്ചതിലും കൂടുതൽ പേർക്ക് ഓസ്‌ട്രേലിയൻ പെർമനന്റ് റെസിഡൻസി ലഭിച്ചതായി കുടിയേറ്റ കാര്യ മന്ത്രി അലക്സ് ഹോക്ക് ചൂണ്ടിക്കാട്ടി.
2019-20ൽ 140,000 പേർക്കാണ് റെസിഡൻസി ലഭിച്ചതെങ്കിൽ 2020-21 കാലയളവിൽ 160,052 പേർക്ക് ഓസ്‌ട്രേലിയൻ PR ലഭിച്ചതായാണ് കുടിയേറ്റ വിഭാഗത്തിന്റെ കണക്കുകൾ.
ഓസ്‌ട്രേലിയൻ പെർമനന്റ് റെസിഡൻസി ലഭിച്ചവർ ഏത് രാജ്യങ്ങളിൽ നിന്ന് വരുന്നു എന്ന കണക്കുകളിൽ ഇന്ത്യയിൽ നിന്നുള്ളവരാണ് രണ്ടാം സ്ഥാനത്ത്. ചൈനയിൽ നിന്നുള്ളവരാണ് ഏറ്റവും കൂടുതൽ.
2020-21 കാലയളവിൽ പാർട്ണർ വിസ വിഭാഗത്തിൽ വിപുലമായ പദ്ധതിയാണ് സർക്കാർ നടപ്പിലാക്കിയതെങ്കിൽ സ്‌കിൽഡ് മൈഗ്രന്റ് വിഭാഗത്തിൽ കുറവുണ്ടായി എന്നാണ് കുടിയേറ്റ കാര്യ വകുപ്പിന്റെ കണക്കുകൾ വ്യക്തമാക്കുന്നത്.
ഓൺഷോറായിട്ടുള്ള നിരവധി അപേക്ഷകർക്ക് വിസ ലഭിച്ച കാര്യമാണ് കുടിയേറ്റ വിഭാഗത്തിന്റെ മുൻ ഡെപ്യുട്ടി സെക്രട്ടറി അബ്ദുൾ റിസ്‌വി ചൂണ്ടിക്കാട്ടിയത്.
ഇതിന് പുറമെ പൂർത്തിയാകാതെ കെട്ടിക്കിടന്നിരുന്ന നിരവധി പാർട്ണർ വിസകളുടെ കാര്യത്തിൽ തീരുമാനമെടുക്കാൻ സർക്കാരിന് കഴിഞ്ഞതായും അദ്ദേഹം കൂട്ടിച്ചേർത്തു.
ഇന്ത്യക്കാർ രണ്ടാമത്
2020-21 കാലയളവിൽ ഏറ്റവും അധികം പെർമനന്റ് റെസിഡൻസി ലഭിച്ചരിക്കുന്നവരുടെ എണ്ണത്തിൽ ഇന്ത്യയിൽ നിന്നുള്ളവരാണ് രണ്ടാമതെന്ന് ഈ വർഷം സെപ്റ്റംബർ 21ന് പുറത്ത് വന്ന വിവരങ്ങൾ വ്യക്തമാക്കുന്നു. ഇന്ത്യയിൽ നിന്നുള്ള 21,791 അപേക്ഷകർക്ക് PR വിസ ലഭിച്ചതായാണ് കണക്കുകൾ. മുൻ വർഷത്തെ അപേക്ഷിച്ച് 4000 ത്തിന്റെ കുറവുണ്ട്.
ഒന്നാം സ്ഥാനത്തുള്ള ചൈനയിൽ നിന്ന് 22,207 പേർക്കാണ് PR വിസ ലഭിച്ചത്.
പാർട്ണർ വിസയും ബിസിനസ് വിസയും ലഭിച്ചവരുടെ എണ്ണം കൂടിയപ്പോൾ ഈ കാലയളവിൽ സ്‌കിൽഡ് മൈഗ്രന്റ് വിഭാഗത്തിൽ നൽകിയിരിക്കുന്ന വിസകളുടെ എണ്ണം കുറഞ്ഞു എന്ന് റിസ്‌വി ചൂണ്ടിക്കാട്ടി.
2020ൽ മൈഗ്രേഷൻ പദ്ധതിയിൽ ആകെയുള്ള PR വിസകളിൽ 70 ശതമാനവും സ്‌കിൽഡ് കാറ്റഗറിയിൽ ആയിരുന്നെങ്കിൽ ഇതിപ്പോൾ 50.7 ശതമാനത്തിലേക്കാണ് കുറഞ്ഞത്.
കടപ്പാട്: SBS മലയാളം
