Monday, 01 January 2018 11:01

നടിയെ ആക്രമിച്ച കേസില്‍ ദൃശ്യങ്ങള്‍ ആവശ്യപ്പെട്ട് ദിലീപ് കോടതിയിലേക്ക്

കൊച്ചി: നടിയെ ആക്രമിച്ച കേസിൽ നടൻ ദിലീപ് വീണ്ടും കോടതിയെ സമീപിക്കാനൊരുങ്ങുന്നുവെന്ന് സൂചന. നടിയെ ആക്രമിക്കുന്നതിന്‍റെ ദൃശ്യങ്ങൾ ആവശ്യപ്പെട്ട് ദിലീപ് അങ്കമാലി മജിസ്ട്രേറ്റ് കോടതിയിൽ അപേക്ഷ നല്കുമെന്നാണ് വിവരം.

ഇതോടൊപ്പം സുപ്രധാന രേഖകൾ നൽകാതെ പോലീസ് ഒളിച്ചുകളിക്കുന്നുവെന്ന പരാതിയും അദ്ദേഹം കോടതിയിൽ ഉന്നയിക്കും. അന്വേഷണസംഘം കുറ്റപത്രം കോടതിയിൽ സമർപ്പിച്ചതിന് പിന്നാലെ അപേക്ഷ നൽകി ദിലീപ് അതിന്‍റെ പകർപ്പ് എടുത്തിരുന്നു.

നടിയ ആക്രമിക്കുന്ന ദൃശ്യങ്ങള്‍ അടക്കം തനിക്കെതിരായ തെളിവുകൾ പൂർണമായും ലഭിക്കണമെന്നാണ് പ്രതിഭാഗത്തിന്‍റെ പുതിയ ആവശ്യം. വിചാരണയ്ക്ക് മുന്നോടിയായി ഇവ ലഭിക്കാൻ എല്ലാ പ്രതികൾക്കും അർഹതയുണ്ടെന്ന കാര്യം ചൂണ്ടിക്കാണിച്ചാകും കോടതിയെ സമീപിക്കുകയെന്നാണ് സൂചന.

കേസ് വിചാരണയിലേക്ക് കടക്കുമ്പോൾ, തന്നെ കുറ്റപത്രത്തിൽ നിന്ന് ഒഴിവാക്കണമെന്ന് ദിലീപ് അഭിഭാഷകൻ മുഖേന ആവശ്യപ്പെടുമെന്നും സൂചനകളുണ്ട്.