Monday, 18 December 2017 12:02

ഗുജറാത്തില്‍ ആറാമൂഴം; ഹിമാചലും പിടിച്ച് ബിജെപി

അഹമ്മദാബാദ്: രാജ്യം ഉറ്റുനോക്കിയ ഗുജറാത്തിലെയും ഹിമാചല്‍ പ്രദേശിലെയും തിരഞ്ഞെടുപ്പ് ഫലം ബിജെപിക്കൊപ്പം. ഗുജറാത്തില്‍ തുടര്‍ച്ചയായ ആറാം തവണയും ഭരണം നിലനിര്‍ത്തിയ ബിജെപി ഹിമാചല്‍ കോണ്‍ഗ്രസില്‍ നിന്ന് പിടിച്ചെടുത്തു. പ്രതീക്ഷകള്‍ക്കൊത്ത് ഉയരാന്‍ സാധിച്ചില്ലെ‍ങ്കിലും 99 സീറ്റുകളില്‍ വ്യക്തമായ ഭൂരിപക്ഷവുമായാണ് ബിജെപി ഗുജറാത്തില്‍ ഭരണം ഉറപ്പിച്ചത്. 80 സീറ്റുകളില്‍ ജയിക്കാനുള്ള വ്യക്തമായ ഭൂരിപക്ഷം കോണ്‍ഗ്രസിനുമുണ്ട്. ഹിമാചലില്‍ നേരത്തെ 26 സീറ്റുകളില്‍ ഒതുങ്ങി നിന്ന ബിജെപിക്ക് 44 സീറ്റുകളുമായി മികച്ച നേട്ടം കൈവരിക്കാന്‍ സാധിച്ചു. വോട്ടിങ് ശതമാനം വര്‍ധിപ്പിക്കാനും ബിജെപിക്ക് കഴിഞ്ഞു. കോണ്‍ഗ്രസ് 36 സീറ്റില്‍ നിന്ന് 21-ലേക്ക് ഒതുങ്ങി. അതേസമയം ഹിമാചലില്‍ ബിജെപിയുടെ മുഖ്യമന്ത്രി സ്ഥാനാർത്ഥി പ്രേംകുമാർ ദൂമല്‍ തോറ്റത് ബിജെപിക്ക് തിരിച്ചടിയായി.

രാഹുല്‍ ഗാന്ധിയുടെയും പ്രധാനമന്ത്രി നരേന്ദ്ര മോദിയുടെ നേരിട്ടുള്ള ബലപരീക്ഷണത്തിന് വേദിയായ തിരഞ്ഞെടുപ്പില്‍ കോണ്‍ഗ്രസ് നിലമെച്ചപ്പെടുത്തി. ഒരു ഘട്ടത്തില്‍ ബിജെപിയെ മറികടന്ന് ലീഡ്നില ഉയര്‍ത്തിയ കോണ്‍ഗ്രസ് ബിജെപിക്ക് കടുത്ത വെല്ലുവിളി ഉയര്‍ത്തി. കഴിഞ്ഞതവണ 61 സീറ്റുകളുണ്ടായിരുന്ന കോണ്‍ഗ്രസ് എഴുപതിന് മുകളില്‍ സീറ്റുകള്‍ നേടി. കോണ്‍ഗ്രസിന് നേരത്തെ 16 സീറ്റുകള്‍ മാത്രമുമുണ്ടായിരുന്ന സൗരാഷ്ട്രാ, കച്ച് മേഖലയിലാണ് കോണ്‍ഗ്രസ് പ്രധാനമായും നേട്ടമുണ്ടാക്കിയത്. ഇവിടെ 28 സീറ്റുകളില്‍ കോണ്‍ഗ്രസും 26 സീറ്റുകളില്‍ ബി.ജെ.പിയും ലീഡുയര്‍ത്തി.

ഗ്രാമീണ മേഖലയില്‍ കര്‍ഷകര്‍ സര്‍ക്കാറിനെതിരെ വോട്ട് ചെയ്തപ്പോള്‍ ഒബിസി വിഭാഗം ബിജെപിക്കൊപ്പം നിന്നു. അതേസമയം പട്ടികജാതി വിഭാഗങ്ങള്‍ ബിജെപിയെ കൈവിട്ടു. തെക്കന്‍ ഗുജറാത്തിലെയും മധ്യഗുജറാത്തിലെയും പത്ത് സിറ്റുകള്‍ ബിജെപിക്ക് നിര്‍ണായകമായി. മധ്യഗുജറാത്തില്‍ 32 സീറ്റുകളില്‍ ബിജെപിയും 26 സീറ്റുകളില്‍ കോണ്‍ഗ്രസുമാണ് ലീഡുയര്‍ത്തിയത്. വഡോദരയില്‍ ബിജെപി ഒന്പത് സീറ്റുകള്‍ നേടിയപ്പോള്‍ കോണ്‍ഗ്രസിന് ഒരു സീറ്റ് മാത്രമാണ് ലഭിച്ചത്. രാജ്കോട്ടില്‍ ബിജെപി ആറും കോണ്‍ഗ്രസ് രണ്ടും സീറ്റുകള്‍ നേടി.

വടക്കന്‍ ഗുജറാത്തില്‍ 33 മണ്ഡലങ്ങള്‍ ബിജെപിക്കൊപ്പം നിന്നപ്പോള്‍ കോണ്‍ഗ്രസ് 22 സീറ്റുകളില്‍ ലീഡുയര്‍ത്തി. ജിഎസ്.ടിയുടെ പേരില്‍ ബിജെപി ഭയന്ന സൂറത്തില്‍ ബിജെപി 12 സീറ്റുകള്‍ സ്വന്തമാക്കി. ഇവിട കോണ്‍ഗ്രസിന് മൂന്ന് സീറ്റുകള്‍ മാത്രമാണുള്ളത്. അഹമ്മദാബാദില്‍ 21 സീറ്റുകളില്‍ 16ഉം ബിജെപി സ്വന്തമാക്കി. അതേസമയം നരേന്ദ്ര മോദിയുടെ ജന്മസ്ഥലമായ വദ്‍നഗറില്‍ ബി.ജെ.പി സ്ഥാനാര്‍ത്ഥി തോറ്റു. ഇവിടെ കോണ്‍ഗ്രസിന്റെ ഡോ. ആശാ പട്ടേലാണ് വിജയിച്ചത്.

ലോക്സഭാ തെരഞ്ഞെടുപ്പുമായി താരതമ്യം ചെയ്യുമ്പോള്‍ ബി.ജെ.പിയുടെ വോട്ട് വിഹിതത്തില്‍ കുറവ് വന്നിട്ടുണ്ട്. എന്നാല്‍ ഗുജറാത്തിലെ രാഷ്ട്രീയ സാഹചര്യങ്ങളും പട്ടേല്‍ സമുദായത്തിന്‍റെ എതിര്‍പ്പുകളും മറികടന്ന് തരക്കേടില്ലാത്ത വിജയം കൈവരിച്ചതിന്‍റെ ആവേശത്തിലാണ് ബിജെപി. എന്നാല്‍ പ്രധാനമന്ത്രി മുതലുള്ള കാബിനറ്റ് മന്ത്രിമാര്‍ കിണഞ്ഞ് പരിശ്രമിച്ച ബിജെപി കോട്ടയില്‍ വിള്ളലുണ്ടാക്കാന‍് സാധിച്ചതിന്‍റെ ആശ്വാസം കോണ്‍ഗ്രസിനുമുണ്ട്.